కథలెందుకు?

ఈ ప్రశ్న మన చిన్నప్పడు మనకెప్పడైనా ఒచ్చిందా?... రాలేదు.

ఇపుడు పిల్లలెవరికైనా వస్తుందా?... రాదు.

ఆ రాలేదుకీ. ఈ రాదుకి. సంబంధం లేదు.

మనమంతా కథలలో పెరిగాం.

అరుగు మీద కూర్చోబెట్టి అన్నం పెడుతూ అమ్మమ్మ చెప్పిన రాముడి కథలు, కృష్ణుడి కథలు... పెరట్లో నవారు మంచం మీద తాతయ్య పక్కలో ఒదిగిపోయి, గమ్మతైన ముసలివాసనని ఎంతో ఇష్టంగా పీలుస్తూ ఆ గంభీరమైన గొంతులో విన్న స్వాతంత్ర్య పోరాట కథలు...

మన రక్తంలో ఇంకా ప్రవహిస్తూనే ఉన్నాయి. ఎన్నివిన్నా కడుపు నిండక ఇంకా ఇంకా అని వెంపర్లాడడమే గానీ, "కథలెందుకు?” అని ఎన్నడైనా ప్రశ్న ఒచ్చిందా? రాలేదు.

ఈరోజు ఉద్యోగాల పుణ్యమా అని మనకు, టివిల పుణ్యమా అని అమ్మమ్మలకు గానీ, తాతయ్యలకు గానీ కథలు చెప్పే తీరికలేదు.

స్కూళ్ళ పుణ్యమా అని, ట్యూషన్లు పుణ్యమా అని వాళ్ళకి వినే తీరిక లేదు! కాబట్టి 'కథలెందుకు?’ అనే ప్రశ్న మన పిల్లలకు రాదు.

అన్యాయం... పాపం... అని మనకనిపించకపోతే మనం మనుషులమేనాండీ?...

ఐనా... ఈ ప్రశ్న రానే వచ్చింది కాబట్టి సమాధానం వెతుక్కొందాం.

చదవండి...

పిల్లలు కథలెందుకు వినాలి?

• ఆకట్టుకునేలా, హావభావాలతో, నాటకీయంగా కథచెప్పగలిగితే పిల్లలు ఒళ్ళుమరచి, కళ్ళు చెవులు అప్పగించి వింటారు. అప్పడు వారి ఏకాగ్రత తారాస్థాయిలో ఉంటుంది.
• ఆసక్తిగా వినే క్రమంలో అర్థం కాని పదాలు దొర్లితే వాటిని అప్రయత్నంగానే సందర్భానుసారంగా అర్థం చేసుకునే ప్రయత్నం చేస్తారు - కథ వాటి మూలంగా ఆగడం నచ్చదు కనుక, అర్థం కాని పదంగానీ, విషయం గానీ కథ అర్థం కావడానికి అడ్డం పడుతోంది అనిపిస్తే వెంటనే ప్రశ్నిస్తారు. ప్రశ్నలు వేయడం - సందేహాలు తీర్చుకోవడం అలవడుతుంది.
• టి.వి., కంప్యూటర్ వంటి దృశ్యమాధ్యమాల్లో ఊహించేందుకు తావుండదు. కథ వింటున్నపిల్లలు అందులోని దృశ్యాలనీ, వ్యక్తుల్నీ జంతువుల్నీ వారి ఊహల్లో చూస్తారు. అదో అద్భుతమైన అనుభవం!
• ఊహల్లో – నిజ జీవితంలో ఎన్నడూ అనుభవంలోకి రాని వింతైన అనుభవాలకు లోనౌతారు. (సాహసం, పరాక్రమం, గాలిలో ఎగరడం, ఈగంత చిన్నగా అయిపోవడం, కొండంత పెద్దగా పెరిగిపోవడం లాంటివి)
• సాధారణంగా పిల్లలు కథలోని ప్రధాన పాత్రలతో తమని గుర్తించుకుంటారు. (ఆడపిల్లలైతే రాజకుమార్తెగానో, అబ్బాయైతే రాజకుమారుడిగానో). ఆ పాత్రల యొక్క లక్షణాలు తమవిగా ఊహించుకోవడంలో అప్రయత్నంగా మంచి విలువలను, వీరోచిత లక్షణాలను కలిగి ఉండడం, చెడును ఎదిరించడం, న్యాయాన్ని రక్షించడం లాంటి గుణాలు తమలో ఉండాలని కోరుకుంటారు. (అందుకే చిన్నపిల్లల కథల్లో ప్రధాన పాత్రలు ఉదాత్తంగా, ఉన్నతంగా ఉండాలి).
• విభిన్న నేపథ్యాలున్న కథలు చెప్లే పిల్లలు వాటి ద్వారా ఎన్నో సంగతులు నేర్చుకుంటారు. పాఠం వినేటప్పటికంటే, కథ వినేటప్పడు ఏకాగ్రత పదిరెట్లు ఎక్కువ ఉంటుంది కాబట్టి, చరిత్ర సంగతులు, పురాణగాధలు, వివిధ దేశాల జీవనశైలులు లాంటి విషయాలెన్నో కథల ద్వారా విన్నప్పడు వాటిని సులభంగా గుర్తు పెట్టుకుంటారు.
• హాస్యపూరిత కథలైనా, సాహస గాధలైనా, పురాణాలైనా, పంచతంత్రం వంటి జంతువుల కథలైనా, ప్రస్తుత కాలం నేపథ్యంగా ఉన్న కథలైనా... ఏవైనా గానీ మంచి-చెడులను పిల్లలు అలవోకగా వడపోసి విలువలను వారే నిర్ధారించుకోగలుగుతారు. నీతిని ప్రత్యేకించి చెప్పనక్కర్లేదు. కథల్లోని పాత్రలు, వాటి లక్షణాలు పిల్లలపై వారి వ్యక్తిత్వ నిర్మాణంపై గాఢమైన ప్రభావం చూపిస్తాయి.
• కథలు చెప్పడం - పిల్లలు వినడంలో పెద్దలకు పిల్లలకు మధ్య అనుబంధం ఏర్పడుతుంది. మీరు అమ్మా నాన్నలైతే మీ పట్ల పిల్లలు మరింత ఆపేక్ష పెంచుకుంటారు. మీరు టీచరైతే పిల్లలకు దగ్గరవడానికి. వారిలో బెరుకు. సంకోచం పోగొట్టడానికి ఇది మంచి మార్గం.

పిల్లలు కథలెందుకు చదవాలి?

చదివే అలవాటున్న పిల్లలు చదవడం, వ్రాయడం, విషయ పరిజ్ఞానం, సృజనాత్మక వ్యక్తీకరణ లాంటి విషయాల్లో ఖచ్చితంగా మెరుగ్గా ఉంటారు.

పిల్లలు పుస్తకాలు ఎందుకు కొనుక్కోవాలి?

వారాంతాల్లో సినిమాకో, మాల్ కో, హెూటల్ కో తప్పనిసరిగా తీసుకెళ్ళడం మధ్య తరగతి కుటుంబాలలో సంప్రదాయమై పోయిందీ మధ్యకాలంలో వాటికయ్యే వేల రూపాయల ఖర్చుతో పోలిస్తే నెలకి రెండు మూడు వందలు పెట్టి, పుస్తకాలు కొనడం భారం కాదు.